Potetbygda Fitjar

Det fruktbare rike jordsmonnet i Fitjarbygda var vidgjete heilt frå folk gjekk frå sankekultur i steinalderen til bondesamfunn med dyrking av gras og vekster. Og ettersom Fitjar er ein del av Geoparken Sunnhordland, er det viktig for oss å få fram kor viktig geologien er for jordsmonn og vasskvalitet. Mikrobryggeriet ELØ hevdar at den særs gode vasskvaliteten på vatnet frå Svartavatnet på toppen av Midtfjellet har mykje å seie for det gode ølet som vert brygga her.

Poteter har frå gamalt av vore særleg viktig for bøndene i Fitjar. Kvart år sigla dei til "by'dn" (Bergen) med båtane fulle av poteter for sal til fine byfruer. Dei selde frå båtane, men traska også i smau og smitt, banka på dørene og baud fram potetene. Ein av karane fekk spørsmål frå ei frue om potetene var melne? Ja, sa han, det var dei. Då ville ho ikkje kjøpa potetene. Neste gong han fekk spørsmål om potetene var melne, svara han at nei, dei var kokefaste. Då ville ikkje den frua ha potetene. Den tredje gongen spørsmålet vart stilt, svara han "Tja, det vert etter som De vil ha dei, det".

Fitjarbuen er glad i poteter, og på folkemunne seiast det at når dei skipa lag kor det var mange folk frå Fitjar, så rekna dei dobbelt så mange poteter til kvar.